Novas

O domingo 28 de marzo Berrogüetto aparecerá na reportaxe feita polo programa arxentino Mp3, Música Para el Tercer Milenio. O programa poderase seguir en directo a través de Canal7 ás 13hs de Arxentina ou posteriomente no blog do programa.

Este prestixioso programa emítese desde 2007 no Canal7 da TV pública arxentina e desde fai dúas tempadas en canles de Venezuela, Colombia e Uruguai.

O leitmotiv de Mp3 é a investigación dos ritmos musicais. No seu primeiro ano tratou todos os ritmos arxentinos ampliando logo o rexistro aos ritmos latinoamericanos. O programa contribuíu á divulgación do candombe, charanga, vallenato, guarania, bossanova e trova, entre moitos outros.

Achéganse a cada ritmo coa axuda dun guía referente de cada pobo, co que constrúen un relato didáctico non limitado a eruditos musicais. Así entrevistaron a iconas culturais como Silvio Rodríguez, Mario Benedetti, Carlos Vives, Vicente Feliú, Eugenia León, o Mariachi Vargas, Quilapayun, Isabel Parra, Caetano Veloso, Naná Vasconcellos e Cecilia Todd.

A visita a Galiza

Visitaron Galiza en busca de parte das bases melódicas e instrumentais que nutriron a América de ritmos. Atoparon esas similitudes e esa herdanza, amplamente citada polos músicos latinoamericanos, na voz dos mamaron esas músicas de pequenos, dos acuñaron guitarras do vello continente, gaitas, acordeóns, arpas e cantos.

No programa do domingo 28 mostraran a entrevista realizada a Berrogüetto polo equipo de Mp3 no seu local de ensaio en Caldas de Reis. Nela conversan sobre o percorrido das músicas galegas ao chegar a América, o sincretismo que experimentaron, a súa relación cos ritmos americanos e con diferentes intérpretes.